A Xunta de Galicia convoca a VI edición do Premio ao Mellor Proxecto Fin de Carreira (PFC) con Software Libre (SwL) correspondente ao ano 2013 que se rexerá polas seguintes bases de participación.

A Xunta de Galicia convoca este importante premio dentro das liñas de actuación para mellorar e potenciar os mecanismos de formación e difusión do Software Libre na cidadanía galega recollidas no Plan de Acción en Materia de Software Libre 2013.

A Xunta da así continuidade dende o ano 2012 á iniciativa promovida pola empresa Igalia nas edicións anteriores dende o ano 2007 co obxectivo de darlle un novo pulo ao premio integrando nel aos distintos axentes do ecosistema do software libre galego coa mesma estratexia global e integradora transversal a todas as actuacións de dito Plan de Acción.

Dada a orientación deste premio aos estudantes do Sistema Universitario Galego, a Xunta de Galicia considerou que o mellor para incrementar o achegamento e difusión do premio entre o estudantado universitario sería contar coa colaboración da OSL do CIXUG para a organización do premio.

O obxectivo da convocatoria deste premio é concretamente o fomento e o achegamento dos universitarios galegos ao software libre, de xeito que poida incrementar o coñecemento que estes teñan sobre este tipo de tecnoloxías, e en consecuencia abrirlles as portas a novas posibilidades de emprego de calidade relacionado coas tecnoloxías da información e da comunicación, xa que ademais das cuestións éticas e de compartición do coñecemento relacionadas co Software Libre, este constitúe un área de traballo en crecemento.

Con esta iniciativa a Xunta desexa continuar premiando a labor que están a realizar os universitarios galegos á vez que se pon en valor o traballo que realizan durante o seu Proxecto Fin de Carreira.

Poderá optar ao premio calquera estudante matriculado nalgunha das titulacións de primeiro ou segundo ciclo do Sistema Universitario Galego, que teña presentado e defendido o seu Proxecto de Fin de Carreira (Proxecto de Fin de Grao), cunha nota mínima de 5.0, nalgunha das convocatorias do ano académico 2012/2013, ben sexa ordinaria ou extraordinaria.

Ademais para poder participar neste premio o PFC deberá cumprir os seguintes requisitos:

1. Que sexa realizado cunha implementación libre de calquera linguaxe de programación.
2. Que o software desenvolvido durante o PFC teña unha licenza libre entre as recoñecidas como tal pola Free Software Foundation ou a Open Source Initiative.

Tamén poden participar os proxectos que, cumprindo os requisitos previos, sexan realizados utilizando hardware libre.

O prazo de inscrición para participar no premio estará aberto ata o 31 de outubro de 2013.

Os pasos necesarios para presentar o PFC ao premio son os seguintes:

• Inscribir o proxecto na forxa de mancomún no tópico “Concursos > Premio ó mellor PFC con Software Libre > 2013”
• Entregar unha memoria (máximo 10 páxinas) explicativa dos aspectos específicos do Software Libre e actividade pública do proxecto. A memoria deberá publicarse na sección Documentos do proxecto na Forxa
• Darse de alta na lista de correo do premio onde se resolverán todas as dúbidas que poidan ter os participantes, así como para coordinar o acto de resolución do premio.
• Cubrir o formulario de inscrición

O Premio ao mellor PFC con Software Libre terá unha dotación económica de  1.000€. Ademais, se o xurado o considerase adecuado, podería concederse tamén un accésit de 500€.

O premio poderá ser declarado deserto no caso de que ningún dos presentados reúna, segundo a opinión do xurado, a calidade mínima necesaria.

O xurado do premio estará composto por:

• Xunta de Galicia (2 persoas): Representante da AMTEGA ou persoa na que delegue e Responsable da Oficina de Coordinación de Software Libre ou persoa na que delegue.
• Universidades galegas (3 persoas): os directores/decanos das tres escolas/facultades de informática, ou a persoa na que deleguen.
• Asociación GPUL (1 persoa): Presidente da asociación GPUL ou persoa na que delegue.

O xurado, á hora de tomar a súa decisión, terá en conta os seguintes aspectos:

• Calidade do proxecto: deseño e implementación.
• Nivel de actividade pública do PFC. Valorarase a publicación continúa do traballo, ben sexa utilizando as listas de correo dun proxecto existente, as da forxa de mancomun.org ou calquera outro medio web, coma por exemplo blogs persoais; a colaboración con outros proxectos de software libre; a correcta elección dunha licenza libre...

Hai que recordar que este premio non trata só de recompensar a un proxecto tecnicamente bo, senón a un bo proxecto de software libre.

Unha vez rematado o prazo de presentación de candidaturas, o xurado fará unha primeira avaliación dos proxectos presentados, e poderá en función do número de participantes, facer unha selección dos finalistas que acudirán ao acto de resolución do premio.

O día do acto de resolución do premio, que será anunciado coa debida antelación, os finalistas terán que realizar unha breve presentación ante o xurado, do traballo realizado no seu proxecto, facendo especial fincapé nos aspectos do seu proxecto relacionados co Software Libre, dos logros acadados, das perspectivas de futuro ...

O xurado terá a posibilidade de realizar as preguntas que estime oportunas a cada un dos finalistas logo de realizadas as súas presentacións. En base a isto o xurado deliberará e emitirá a súa resolución respecto da concesión do premio.

A decisión do xurado será inapelable. O feito de presentar a candidatura ao premio supón a aceptación expresa destas bases.