IntegraTUM WebDisk é unha aplicación web en Software Libre, baixo licenza GNU GPLv2, que permite o acceso a un servidor de ficheiros. Os servidores de ficheiros soportados son samba, MS Windows e NetApp OnTAP, e calquera outro baseado no protocolo CIFS.

WebDisk non ten ningunha base de datos de usuarios facendo a autenticación directamente sobre o servidor de CIFS. Pode ser unha ferramenta útil nas PEME que teñen os equipos en rede e precisan compartir os seus ficheiros dun xeito sinxelo.

A autenticación pódese facer empregando o sistema de autenticación NTLM ou texto plano.

Todas as operacións sobre os ficheiros e cartafois pódense facer por medio dun navegador web permitindo incluso navegar entre os distintos servidores da rede. WebDisk conta cun xestor de marcadores para ter ligazóns aos cartafois desexados e cun xestor de permisos que se conecta directamente co servizo LDAP do Active Directory. As operacións que levan a cabo os usuarios quedan rexistradas por medio de Log4J.

IntegraTUM WebDisk foi desenvolvida empregando Java Servlets e a biblioteca jCIFS. JCIFS é unha biblioteca 100% Java que implementa o protocolo de rede CIFS/SMB.

---

Artigos relacionados

• Brasil votou con Linux
• Cursos de SwL no Centro de Novas Tecnoloxías de Galicia
• Webkit é o primeiro motor de renderizado dun navegador que pasa o test Acid3 ao 100%
• O rendemento Javascript será entre 20 e 40 veces máis veloz en Firefox
• Pivot, un framework Java para o desenvolvemento de aplicacións web e de escritorio