| O IES San Clemente promove a presenza do galego na Wikipedia |
|
|
|
| escrito por mancomun.org o Xoves, 15 de Maio do 2008 | |
|
Con motivo da celebración, o 17 de maio, do Día das Letras Galegas e do Día de Internet, os departamentos de galego e informática do IES San Clemente organizan na véspera desta data unha charla para fomentar a presenza do galego na Wikipedia, así como o seu uso. O obxectivo da xornada céntrase en dar a coñecer a Galipedia ao profesorado do centro, informando do carácter colaborativo deste proxecto de ámbito internacional e das súas posibilidades como recurso educativo. Asemade, búscase, con esta iniciativa, a participación activa do persoal docente do centro na mellora e creación de novos artigos, poñendo en valor os contidos das distintas materias xa preparados para as clases cotiás. Deste xeito, incrementaríase notablemente o número de artigos en lingua galega na Wikipedia sen un investimento de esforzos excesivo. A versión galega da Wikipedia naceu o 8 de marzo de 2003, e conta con 34.447 artigos. Outra lingua estatal, como o catalán, ten máis de 115.000 artigos e, no caso do castelán, preto de 360.000 entradas. A charla terá lugar o vindeiro venres día 16 de maio ás 11:00 da mañá, no salón de actos do IES San Clemente, e a súa duración será de aproximadamente 1 hora. Fonte: IES San Clemente    Artigos relacionados |
