Publicada a nova versión de NavalPlan: LibrePlan 1.2

LibrePlan é o novo nome do proxecto NavalPlan, do que xa vos temos falado a raíz da súa presentación por parte de Agasol ás pemes galegas a principios deste ano, como parte das actuacións realizadas no convenio de colaboración coa SXMIT dentro das actuacións do Plan de Acción FLOSS do ano 2011.

NavalPlan naceu en Abril de 2009 co obxectivo de construír unha ferramenta de planificación para o sector auxiliar do naval de Galicia. Foi un proxecto con financiamento público, tanto da Xunta de Galicia como do Ministerio de Industria, Turismo e Comercio con fondos FEDER, que desenvolveu Igalia en colaboración con Wireless Galicia. Este proxecto concibiuse dende os seus comezos baixo a filosofía de compartición de coñecemento e de colaboración das empresas do sector naval galego. Estas compañías precisaban planificar, monitorizar e controlar o avance dos seus proxectos, e as ferramentas que estaban a empregar non lles cubrían as súas necesidades.

Unha vez rematado o desenvolvemento deste proxecto dirixido ás empresas navais, comprobouse que a ferramenta obtida era un xestor de proxectos xenérico axeitado para o seu uso noutros sectores industriais e mesmo en organizacións e institucións públicas.

A comunidade de desenvolvemento de NavalPlan, firmemente convencida do propósito xeral e da potencialidade da ferramenta para calquera sector, tomou a decisión de mudar de nome ao proxecto cara LibrePlan co ambicioso obxectivo de que se converta no aplicativo web de planificación de proxectos máis importante no mundo do software libre.

As principais novidades que trae LibrePlan 1.2, ademais de por suposto o seu novo nome e portal web, son as seguintes:

• Corrección de erros.
• Melloras no motor de asignación de recursos.
  • Os movementos de tarefas na vista de Gantt manteñen a función configurada para a asignación de recursos.
  • Detección automática das reservas manuais de recursos no modo de reserva avanzada.
  • Capacidade de bloqueo da reserva manual de recursos na vista de Gantt.
• Compartición dos estados entre perspectivas. A planificación de proxectos en LibrePlan pode realizarse dende varias perspectivas; temporalización do proxecto (Gantt), detalles do proxecto (WBS), carga dos recursos, ou reserva avanzada. Ata agora para cambiar de perspectiva era preciso gravar todos os cambios para non perdelos. Nesta nova versión isto xa non é necesario.
• Autenticación LDAP e módulo de autorización. Desenvolveuse un módulo de autenticación e autorización a través de LDAP para pode empregar o directorio de usuarios da empresa sen necesidade de crealos novamente en LibrePlan.
• Área “A miña conta” na que cada usuario pode xestionar os seus datos persoais, as preferencias do aplicativo como por exemplo o idioma da interface e mudar o seu contrasinal.
• Internacionalización. Ademais de español, galego e inglés esta nova versión está tamén dispoñible en ruso e portugués. A plataforma escollida para a xestión das traducións é Transifex, e na última semana comezou a haber actividade de tradución ao Francés.
• Migración á Community Edition ZK 5 dende a versión ZK 3.6 o que supuxo un gran traballo de adaptación que permitirá as máis recentes innovacións para as interfaces web ricas así como apreciar importantes melloras no rendemento.
• Probas funcionais. Tendo presente a máxima de obter un proxecto de boa calidade, incorporáronse a LibrePlan unha serie de probas funcionais, baseadas en probas de caixa negra e empregando a ferramenta Sahi, para comprobar que todas as funcionalidades están a funcionar satisfactoriamente. Inicialmente desenvolveuse un pequeno conxunto de probas que medrará co tempo.

Para todos aqueles que desexen coñecer en profundidade LibrePlan, esta completa ferramenta web de planificación de proxectos recomendámoslles percorrer a súa nova web, na que se describen con maior detalle a información do proxecto, todas as súas funcionalidades, así como os servizos ofrecidos en torno a el. Tamén poden ver o vídeo de presentación de LibrePlan na LSWC celebrada os pasados 9 e 10 de novembro en Zaragoza, a documentación e vídeos sobre o uso de LibrePlan, ou mesmo consultar a wiki de documentación técnica do proxecto.

Finalmente tamén é posible probar a demostración en liña e mesmo descargar e instalar LibrePlan.