Unha vez máis temos que felicitar ao equipo galego de tradución de Ubuntu por un novo fito na súa extraordinaria labor por achegar o noso idioma ás novas tecnoloxías da man do software libre e de fontes abertas.

Se durante este ano xa fomos informando do seu bo facer e dos niveis aos que estaban alzando ao idioma galego, sendo o último dos seus méritos a publicación do Manual Comezar con Ubuntu en galego, hoxe pode lerse na web de Trasno, que en tan só 10 días foron quen de rematar a tradución ao galego do navegador Chromium e o sistema operativo ChromeOS, os proxectos de código aberto detrás do navegador e o sistema operativo Chrome de Google respectivamente. 

A rapidez de resposta do equipo galego dende que o día 9 de decembro fose anunciada a apertura das traducións destes aplicativos ao través da plataforma «Launchpad» de Ubuntu, constituíndo o Launchpad Galician Translators e poñéndose mans á obra ata concluíren o traballo o día 19 de decembro, fixo que mesmo fosen felicitados publicamente polos responsables do proxecto por seren uns dos primeiros idiomas en ter traducidos ao 100% todos os ficheiros, xunto co Chinés e o Euskara.