Dispoñible GNOME 3.2 100% en galego

Como se pode ler nas notas de publicación de GNOME 3.2, esta nova versión chega cargada de melloras e novidades entre as que podemos destacar, entre outras moitas:

• Xestión de contas en liña. O almacenamento de documentos, contactos, calendarios, ... en liña está facéndose moi popular polo que GNOME 3.2 incorpora o aplicativo Contas en liña que fornece un lugar onde xestionar estes orixes en liña. Estas contas en liña son usadas automaticamente en Documents, Contacts, Empathy, Evolution así como no calendario despregable.
• Xestión de documentos mellorada. GNOME 3.2 consciente da dificultade de xestionar gran cantidade de documentos, prestou especial atención a facer máis doada esta tarefa. Así o aplicativo Documentos enfócase en fornecer unha forma sinxela e efectiva de atopar, organizar e ver documentos. Ademais, grazas á integración con Contas en liña, non é preciso preocuparse por se os documentos están almacenados en local ou en liña.
• Nova xestión integrada de contactos. Contacts é un novo aplicativo enfocado nas persoas. A súa misión é fornecer unha vista xeral das persoas na súa lista de contactos, tanto se os contactos se almacenan en liña, no Evolution ou no aplicativo de conversas Empathy.
• Mensaxería instantánea completamente integrada. Non será preciso abrir una aplicativo para iniciar sesión nos servizos de chat e mensaxería, cambiar de estado, ... todo isto está integrado en GNOME 3.2
• Melloras en accesibilidade. Integrouse un novo teclado en pantalla, mellorouse a visualización superposta do teclado en pantalla. Agora é completamente navegable co teclado e os usuarios do lector de pantalla Orca experimentaran unha presentación moito máis fiable e precisa cando estean navegando, e moitas outras melloras no rendemento e experiencia final cando se empregan tecnoloxías adaptadas. Neste punto é importante destacar tamén a participación da comunidade galega no GNOME Accesibility Team , que celebraron en maio deste ano na Coruña na sede de Igalia, unha Hackfest sobre ATK e AT-SPI, onde traballaran no impulso e desenvolvemento das tecnoloxías que fan que o entorno GNOME sexa accesible.
• Documentación que realmente axuda. A documentación de usuario tradicional está escriba nun libro de papel, unha boa historia, pero é moi larga e leva moito tempo lela enteira. Isto non é ideal se quere buscar de forma rápida como levar a cabo certas tarefas. Para solucionar isto, os seguintes aplicativos agora inclúen unha documentación orientada a tarefas:
  • O explorador de accesibilidade Accerciser
  • O aplicativo de gravación de CD e DVD Brasero
  • O aplicativo de cámara web Cheese
  • O visor de escritorios remotos Vinagre
  • O visor de imaxes Ollo de GNOME
  • O aplicativo de correo electrónico e calendario Evolution
  • ...
  • Tamén hai importantes melloras na Axuda do escritorio.
  Destacar que moita desta nova documentación está entre a que é posible atopar traducida ao galego.

GNOME 3.2 espérase que sexa ben recibida polos usuarios e empresas. No anuncio da publicación recóllense algunhas das primeiras impresións: Jim Whitehurst, presidente e CEO de Red Hat, afirmou: "Estou moi feliz de ver que a gran innovación que vimos en GNOME 3.0 segue a madurar a unha taxa tan rápida con 3.2". Juan Conde, Director Xefe de Software Libre na Xunta de Andalucía dixo: "Guadalinex vén contando co Gnome desde o seu inicio. Actualmente, temos 600.000 escritorios implantados en escolas con financiamento público, e agora están a traballar nun novo sistema corporativo baseado no escritorio GNOME 3 chamado GECOS (Guadalinex Standard Corporate Edition) que está deseñado para as tarefas diarias do funcionariado público. GNOME 3 foi un gran cambio para Guadalinex e estou contento de ver que o GNOME 3.2 mellora o soporte CSS e extensión para permitir cambios de interface fácil de usuario. Para un goberno, a accesibilidade é unha obriga e GNOME ofrécea coma ningún outro. Grazas GNOME. "

O código fonte de GNOME 3.2 está dispoñible gratuitamente para descargar e redistribuír , aínda que para a maioría de usuarios é aconsellable agardar ata que GNOME 3.2 estea dispoñible a través da súa distribución GNU/Linux ou dos seus provedores. Con todo na web do proxecto é posible consultar a información sobre como obter GNOME 3 para probalo.