O Observatorio de Software Libre é unha iniciativa da Consellaría de Innovación e Industria da Xunta de Galicia, que ten a finalidade de estudar a realidade das empresas, os concellos, os centros educativos e a sociedade galega en xeral, en relación ao uso do Software Libre.

Unha das súas principais actividades é o desenvolvemento dun estudo sobre o nivel de implantación do Software Libre en Galiza que se está a desenvolver en dúas fases de observación separadas doce meses entre si.  Na sección de Informes pódese acceder aos resultados deste estudo.

O observatorio pretende examinar a evolución técnico-económica do Software Libre a través da vixilancia tecnolóxica e do seguimento das políticas e iniciativas nacionais e europeas. Para acadar este obxectivo, asinouse un convenio coas tres universidades galegas.

A Universidade de Santiago de Compostela elaborou un "Informe inicial sobre a tecnoloxía do Software Libre", que é o primeiro dunha serie de informes de observación, que se irán publicando ó longo dos próximos meses, sobre a evolución das tecnoloxías libres.

A Universidade de A Coruña está a elaborar outro informe que complementa a este pero correspondente á liña de observación relacionada coa vixilancia de políticas nacionais e europeas.

A Universidade de Vigo proporcionará información complementaria a ambos traballos.

---