Outras novas

  • GALPon amplia a toda Galicia a axuda en forma de colaboración para un Proxecto de automática/robótica sobre Hardware e Software Libre

    Publicado por Mancomún
    Martes, 1 de Outubro de 2013

    Imaxe engranaxe hardware libreLogotipo de GALPonO pasado mes de xuño, GALPon anunciaba a súa iniciativa a prol da difusión do hardware e software libre.

    Tratábase da convocatoria dunha axuda en forma de colaboración para o desenvolvemento dun proxecto de automática ou robótica empregando hardware e software libre, dirixida a centros educativos da provincia de Pontevedra.

    Onte, 30 de setembro, remataba o prazo para a presentación de candidaturas, pero debido a que todos os proxectos recibidos ou non están debidamente informados ou non acadan un mínimo de calidade, anuncian un importante cambio nas bases:

    Amplíase a zona xeográfica a toda Galicia e o prazo de entrega de propostas ata o día 27 de outubro. Polo que agora calquera centro educativo galego pode participar desta axuda.

    Para todos os interesados en participar, lembramos que a oferta de GALPon, de forma resumida consiste na cesión do hardware libre necesario para o proxecto ademais do asesoramento técnico para o correcto desenvolvemento. Se o proxecto acada os seus obxectivos o equipo recibirá un premio en metálico de 300€.

    [Ler máis]
  • Encontro de usuarios de Chamilo os días 17 e 18 de outubro en Madrid

    Publicado por Mancomún
    Martes, 24 de Setembro de 2013

    O vindeiro mes de outubro vén cargadiño de encontros de proxectos de Software Libre. Así aos encontros de Zentyal en Zaragoza o 3 e 4 de outubro, da Drupal Camp en Cáceres o 26 e 27 de outubro e a GUADEC-es os días 18, 19 e 20 de outubro súmase o Encontro de usuarios de Chamilo os días 17 e 18 de outubro tamén en Madrid.

    Así a Universidade Carlos III de Madrid acolle o Día do usuario de Chamilo, un sistema de xestión da aprendizaxe ou LMS que naceu no ano 2010 tomando como base a plataforma Dokeos, da man da Asociación sen ánimo de lucro Chamilo, e que a día de hoxe conta con máis de 6 millóns de usuarios en máis de 180 países de todo o mundo.

    Asociación sen ánimo de lucro Chamilo organiza anualmente encontros de usuarios, coñecidos como Chamiluda (Chamilo Users Day) cunha dobre finalidade: estimular o intercambio de ideas e a creación de lazos entre os membros da súa comunidade, e achegar o proxecto a todas aquelas persoas que aínda non o coñecen.

    Na web do Chamiluda 2013 pódese consultar xa o programa do encontro así como realizar a inscrición para asistir ao mesmo.

    [Ler máis]
  • GALPon celebra o Día da Liberdade do Software coa versión final de PicarOS Diego 2013

    Publicado por Mancomún
    Venres, 20 de Setembro de 2013

    Captura de PicarOSGALPon fai coincidir co Día da Liberdade do Software o lanzamento oficial da versión final de PicarOS Diego 2013, da que vos falamos hai uns días.

    Así, este sábado 21 de setembro ás 00:00 horas xa está dispoñible a descarga:

    Presentación oficial en Mugardos e Granada

    Aquelas persoas interesadas en ter unha idea xeral das características de PicarOS poden visualizar o vídeo de presentación.

    Miguel Bouzada estará este sábado a partir das 12:00 horas no Kernel 2013 en Mugardos presentando esta nova versión. A presentación poderá ser seguida por Internet a través de Google Hangout. Os interesados en participar non teñen máis que consultar a ligazón dende a comunidade MiniNo ou dende a conta de Miguel Bouzada.

    Ademais, tamén se fará a presentación de PicarOS en Granada, na celebración do Software Freedom Day organizado pola asociación GCubo e a OSL da Universidade de Granada.

    [Ler máis]
  • A distribución para cativos MiniNo PicarOS 2013 xa ten lista a súa versión RC

    Publicado por Mancomún
    Martes, 10 de Setembro de 2013

    Imaxe de PicarOSA distribución GNU/Linux para cativos MiniNo PicarOS 2013 enfía xa a súa recta final coa publicación o pasado sábado da súa versión PicarOS Diego RC. Dende o equipo de desenvolvemento anunciaron, que o sábado ás 13:44:53 remataron de pechar todas as incidencias abertas durante as probas tras engadir as suxestións que foron feitas, polo que procederon á construción da imaxe ISO da versión candidata a versión final.

    Como vos informamos o pasado mes de xuño, na presentación da versión beta, PicarOS Diego é unha distribución GNU/Linux dirixida ao público máis miúdo da casa, os cativos de entre 3 e 12 anos, co obxectivo de facilitarlles o uso do computador, tanto no seu lecer como en tarefas máis relacionadas coa súa aprendizaxe na aula ou na súa vida diaria.

    Así, a distribución, ademais de prestar especial atención ao deseño, facilidade de uso e intuitividade, conta con gran variedade de programas libres para a edición gráfica, multimedia, ofimática, xogos e multiples programas educativos. A lista completa de ferramentas pódese consultar na web do proxecto.

    Os interesados poden descargar PicarOS 2013 Diego da páxina de descargas. Trátase dunha ISO híbrida que pode gravarse nun DVD ou nun USB de polo menos 4GB. No wiki de GALPon pódense consultar as instrucións para transferila a un USB.)

    [Ler máis]
  • Cursos de servizos de seguridade corporativa e comunicación VoIP con software libre no CNTG

    Publicado por Mancomún
    Venres, 6 de Setembro de 2013

    Imaxe do Centro de Novas Tecnoloxías de GaliciaO vindeiro luns 9 de setembro remata o prazo de inscrición de dous cursos organizados polo CNTG; configuración de servizos de seguridade corporativa con tecnoloxía baseada en software libre e o Seguridade en contornas VoIP.

    O curso “Configuración de servizos de seguridade corporativa con tecnoloxía baseada en software libre” terá unha duración de 40 horas e impartirase do 30 de setembro ao 11 de outubro de luns a venres de 9:30 a 13:30 nas instalacións do CNTG. O obxectivo desta acción formativa consiste en que o alumno adquira os coñecementos e as habilidade técnicas necesarias para implantar un servidor proxy , un firewall e un sistema de prevención de intrusos nunha rede corporativa, todo con ferramentas libres. O curso vai dirixido a técnicos/as e administradores/as de rede con coñecementos de administración de servidores Linux.

    O curso “Seguridade en contornas VoIP” terá tamén unha duración de 40 horas e impartirase de luns a venres de 9:30 a 13:30 dende o 23 de setembro ata o 4 de outubro. O obxectivo é dar a coñecer as arquitecturas de VoIP baseadas tanto en software libre como privativo; aprender a auditar a infraestrutura de comunicacións VoIP nunha contorna corporativa e coñecer como configurar de xeito seguro unha plataforma de VoIP, tanto CISCO como con Asterix. Está dirixido a persoal técnico da área de informática ou telecomunicacións con algunha experiencia en VoIP. En particular administradores de rede ou de sistemas ou profesionais con formación regrada nas áreas de telecomunicacións e informática. É recomendable estar en posesión dunha certificación CCNA ou equivalente doutros fabricantes.

    [Ler máis]
  • Linux Mint xa ten réplica en Galicia, grazas á OSL do CIXUG

    Publicado por Mancomún
    Martes, 3 de Setembro de 2013

    Capura de pantalla nas descargas de MintA OSL do CIXUG informa que vén de rematar a configuración e posta en funcionamento no seu servidor de réplicas, posto en marcha hai aproximadamente un ano, da primeira réplica do proxecto Linux Mint no noso país.

    Grazas a esta réplica calquera usuario galego que queira descargar a distribución Linux Mint poderá facelo dende este servidor albergado fisicamente na UDC, coa vantaxe da proximidade e a capacidade do servizo. Na imaxe pode verse como a OSL do CIXUG figura entre os posibles sitios de onde descargar os distintos ficheiros ISO da distribución , sendo o único dispoñible en Galicia e España. A día de hoxe, o espazo necesario para replicar as versións dispoñibles de Linux Mint acadan un total de 143 GB.

    Dende a OSL, afirman que con esta nova réplica contribúen ao promover o coñecemento da distribución no ámbito universitario, e cumpren cos obxectivo da OSL de apoiar os proxectos libres que requiran de promoción dentro da comunidade universitaria galega.

    [Ler máis]
  • Software Libre para aumentar a nosa privacidade na rede e evitar os servizos de vixilancia electrónica non desexados

    Publicado por Mancomún
    Luns, 15 de Xullo de 2013

    Logo de PRISMPRISM é o programa de vixilancia electrónica cualificado de alto segredo a cargo da Axencia de Seguridade Nacional, NSA dos Estados Unidos dende o ano 2007, que recentemente saltou aos medios de comunicación grazas á publicación de documentos segredos por parte do ex-traballador da CIA, Edward Snowden que proban que o goberno estadounidense vixía a miles de usuarios de internet.

    A NSA conta coa colaboración de multitude de empresas de servizos, tales como Microsoft, Facebook, Apple, Google, YouTube, Skype, Yahoo, ... que permiten o acceso da NSA aos nosos datos almacenados nos seus servidores.

    A Free Software Foundation, co obxectivo de protexer a nosa liberdade e privacidade, úrxenos a deixar de usar este tipo de Software como servizo. Para facilitarnos esta aparentemente difícil tarefa de cambio, debido á popularidade destes servizos, a FSF mantén un directorio de proxectos de Software Libre que traballan para promover unha mellor navegación, máis segura e respectuosa coa nosa privacidade.

    Neste mesmo sentido, a asociación Melisa, publica esta semana un breve artigo no que achegan algúns consellos con alternativas libres para avanzar no camiño de mellorar a protección da nosa privacidade na rede.

    [Ler máis]
  • Cursos de verán de software libre

    Publicado por Mancomún
    Mércores, 10 de Xullo de 2013

    A empresa GRUPO BARRÁN S.L., de recente creación, infórmanos das súas próximas actividades de formación e difusión de software libre que organiza para os próximos meses.

    Respecto ás actividades formativas, veñen de abrir o prazo de inscrición para dous cursos de verán sobre software libre, un de GNU/Linux e outro de uso dos principais aplicativos libres dirixidos a todo tipo de usuarios.

    Por outra parte, infórmanos tamén da celebración de dous seminarios “Emprender con Software Libre” que celebrará no mes de Setembro, un no CNTG en Santiago de Compostela e outro no centro Ágora en A Coruña.

    Cartel promocional dos cursosCursos de verán

    Os cursos celebraranse durante os meses de Agosto, Setembro e Outubro, cunha duración de 72 horas cada un e serán impartidos presencialmente en Santiago de Compostela. A oferta de prazas é limitada, e o custe dos cursos é de 20€ ao mes. As persoas interesadas en obter máis información ou inscribirse nos cursos deben contactar coa empresa a través do formulario de contacto ou de inscrición.

    [Ler máis]
  • O Máster Universitario en Enxeñería Informática da UDC fará fincapé na presenza do Software Libre no seu programa

    Publicado por Mancomún
    Xoves, 4 de Xullo de 2013

    Cartel do Máster Universitario en Enxeñaría InformáticaDende a Facultade de Informática de A Coruña infórmannos da oferta para o curso 2013/2014 da segunda edición do Máster Universitario en Enxeñería Informática pola UDC.

    Segundo a información facilitada, o software libre vai ter unha presencia destacada na docencia do máster, na que se empregan linguaxes de programación libres e ferramentas libres específicas como por exemplo a linguaxe R. Ademais tamén vai estar moi presente o software libre nas prácticas en empresa así como nas temáticas das actividades complementarias á formación como seminarios, conferencias impartidas por destacados profesionais nas que a modo de exemplo destacan Libreplan, Opentrad, a accesibilidade en Gnome ...

    Ofértanse 30 prazas e o primeiro prazo de preinscrición remata ás 14:00 horas do vindeiro luns 8 de xullo de 2013.

    [Ler máis]
  • Xornada demostradora de Ephesoft: Captura Intelixente de Documentos con software libre

    Publicado por Mancomún
    Xoves, 16 de Maio de 2013

    Centro Demostrador TICO vindeiro día 28 de maio, o Centro Demostrador TIC acolle a xornada demostradora, organizada por Queres Tecnoloxías, “Ephesoft: Captura Intelixente de Documentos con software libre”.

    O obxectivo desta xornada é presentar aos asistentes a primeira solución open source de dixitalización e captura intelixente de documentación e a súa integración co Sistema de Xestión Documental Alfresco. Destacar que Queres é partner oficial de ambos produtos, Alfresco e Ephesoft.

    A captura intelixente de documentos vai máis alá do simple escaneado e conversión de documentos en papel a un formato dixital. Un sistema de captura intelixente, engade a esta función básica de dixitalización a capacidade de extracción de datos e clasificación automática dos documentos para poñelos a disposición doutros sistemas de información da empresa.

    Logotipo de QueresDende Queres aseguran que tanto dende empresas de servizos financeiros como dende as administracións públicas, cada día aumenta máis a demanda de alternativas aos contornos de captura propietarios existentes, non só polo aforro económico que supón eliminar a necesidade de pagar licenzas de uso, senón tamén pola flexibilidade e posibilidade de adaptación deste tipo de sistemas con licenza libre.

    [Ler máis]
Axencia para a Modernización Tecnolóxica de Galicia
Galicia