O Corpus é un recurso derivado da actividade de localización ao galego de Mancomún.

A función fundamental é documentar e expoñer mediante a comparación dos bitextos inglés-galego cal son as escollas terminolóxicas, as normas de estilo aplicadas así como permitir a reflexión sobre o modelo de lingua.

Para iso o Corpus de Mancomún permite facer buscas de palabras en inglés ou en galego nalgún dos distintos proxectos almacenados, e devolve parellas de frases inglés-galego nas que se atopa o texto procurado e o texto traducido correspondente.

Agora o buscador permite obter ligazóns que permiten referenciar os resultados concretos de consultas ao corpus. A posibilidade de ter ligazóns estábeis de referencia permite o intercambio e a discusión así como o reaproveitamento da información xerada pola comunidade.

Ademais, o Corpus ten unha API aberta (a través de XML e XML-RPC) o que permite a programación de plugins ou aplicativos que traballen contra o Corpus, de maneira que se poden integrar as buscas do Corpus a calquera outro aplicativo, como por exemplo o Lokalize (ferramenta de TAC).

MOTORES DE BUSCA

Ademais, tamén hai dispoñíbeis dous motores de procura (baseados nas especificacións de OpenSearch) para incorporalos na barra de buscas web do Firefox e outros navegadores compatíbeis con OpenSearch, como Internet Explorer.