- Inicio >
- Comunidade > Movemento asociativo > Agrupacións
Agrupacións
Un Grupo de Usuarios de GNU/Linux, (en inglés Linux User Group LUG) é unha asociación sen ánimo de lucro que tenta difundir o uso de GNU/Linux e do software libre no seu ámbito, así como servir de apoio para os usuarios deste tipo de software.
Habitualmente, xorden nas universidades ou centros de estudos, ou en calquera lugar no que persoas interesadas no software libre se reúnen e artellan actividades relacionadas con el, como conferencias, xornadas de difusión, cursos, etc.
Se queres achegarte ao mundo do software libre, é un bo lugar ao que podes acudir para pedir axuda ou buscar información.
Na actualidade, en Galicia somos sabedores das seguintes asociacións de usuarios de GNU/Linux e software libre:
- AGNIX: Asociación de usuarios de GNIX
- AULUSC: Asociación de usuarios de Linux da Universidade de Santiago de Compostela.
- GALITE Grupo Asociado pola Libre Información e a Tecnoloxía de Foz
- GALPON: Grupo de Amigos de Linux de Pontevedra
- GHANDALF: GHandalf ANaliza Difunde e ALenta o Floss
- GLUG: Grupo de Usuarios de Linux de Galicia
- GPUL: Grupo de Programadores y Usuarios de Linux
- GULO: Grupo de Usuarios de Linux de Ourense
- INESTABLE: Grupo de Usuarios de Linux de Ordes
- LUCUX: Asociación de usuarios de Software Libre de Lugo
- MELISA: Asociación de Software Libre de Melide
- OUSLI: Asociación de usuarios de Software Libre de Ourense
Este directorio está aberto a novas incorporacións que aínda non teñamos detectadas.
Existen outras asociacións que aínda que non se adican en exclusividade á difusión do software libre sí o teñen entre os seus obxectivos como un punto importante dentro duns obxectivos máis xenerais de promoción das novas tecnoloxías.
- Amigus de As Pontes. A asociación informática Amigus foi fundada no ano 2002 por un grupo de veciños das Pontes de García Rodríguez, con gustos en común, no uso de novas tecnoloxías, informática e internet.
- Asociación xuvenil GSiC. A asociación grupo xuvenil de informáticos de Cambre foi fundada no ano 2004. Entre os seus obxectivos destacan a promoción de actividades informáticas entre a mocidade do concello de Cambre con especial énfase no software libre e no uso do idioma galego nas novas tecnoloxías.
- Compostela Wireless. Esta agrupación de usuarios ten como finalidade achegar as novas tecnoloxías da comunicación ao cidadán, converténdoas nunha ferramenta máis para a expansión do coñecemento, para comunicarse entre os veciños, pero sobre todo como un dinamizador da actividade social de base, nos barrios e na cidade.
Ademais, existen moitas outras asociacións de ámbito español; a máis antiga é Hispalinux.
Se formas parte doutra asociación que non apareza na lista anterior, por favor ponte en contacto con nós a través do formulario de contacto.
Finalmente cómpre mencionar outras agrupacións que completan o importante tecido asociativo existente en relación ao Software Libre en Galicia.
ASOCIACIÓNS RELACIONADAS COA INFORMÁTICA E A LINGUA:
Os indicadores estatísticos do uso do galego nos aplicativos informáticos é minoritario. O software libre ofrécenos unha excelente oportunidade para localizar software a diferentes idiomas, xa que temos acceso ao código fonte. Neste sentido, existen en Galicia diferentes agrupacións de persoas que levan xa tempo dedicadas á localización de software ao galego. Sen ánimo de excluír a ninguén citamos as seguintes:
- Ciberirmandade da fala: grupo de usuarios que ten como obxectivo a lingua e a cultura galega; pretende espallalas utilizando as redes informáticas. Existe dende 1996.
- Trasno: é un proxecto dedicado á adaptación á lingua galega do sistema GNU/Linux e do software libre en xeral. Existe dende o ano 1999.
Cabe mencionar tamén a Galego21, organización sen fins de lucro que, se ben actualmente cambiou a súa orientación, nos seus comenzos tiña como obxectivo organizar o desenvolvemento, a tradución e o espallamento de programas informáticos en galego usando Internet como medio.
Esta lista non está pechada polo que se pertences a unha agrupación destas características, por favor, contacta con nós a través do formulario de contacto.
Sindicación RSS: Novas