Xa podes descargar OpenOffice.org 2.2 totalmente en galego desde o portal de Mancomun.org. Está dispoñible para GNU/Linux, Windows e Mac OS (tanto para Power PC coma para Intel) na sección de descargas. Se o preferides tamén podedes descargar a imaxe ISO do CD que contén OpenOffice.org para todas as plataformas ou as versións anteriores de OpenOffice.org desde a 2.0.

 A 2.2, a diferencia das versións anteriores, non ten incorporado por defecto o corrector polo que teredes que descargar o ficheiro gl_ES-pack.zip desde o portal de Mancomun.org. Despois poderase agregar o dicionario na opción Ficheiro>Asistentes>Instalar novos dicionarios. O  novo dicionario incorpora melloras implementadas polo equipo de Mancomun.org.

O xoves e o venres pasados tiveron lugar as primeiras xornadas Libremeeting nunha residencia universitaria da serra madrileña. Organizáronse diversos obradoiros e conferencias que se centraban na reflexión arredor do concepto libre nos diferentes ámbitos, desde a programación á arte. A asistencia reduciuse a un terzo da xente preinscrita. Contouse coa presenza de Richard Stallman e de Susan George, presidenta do Observatorio da Mundialización, filósofa e analista política (tamén vicepresidenta de ATTAC Francia).

O goberno da cidade de Berlín rexeitou o 3 de maio o plan do Partido dos Verdes para migrar todos os ordenadores a Software Libre. O voceiro do partido, Olaf Reimann, dixo «A cidade perdeu a oportunidade para cambiar a sua área de tecnoloxías da información e fuxir da dependencia de sempre». A maioría dos lexisladores de Berlín queren continuar a actual mistura de software libre e software propietario.

Convocatoria de subvencións correspondentes aos programas sectoriais de investigación aplicada, PEME I+D e I+D suma do Plan Galego de Investigación, Desenvolvemento e Innovación Tecnolóxica (Incite) e se procede á súa convocatoria para o ano 2007.

A forxa de mancomun.org superou o millón de visitas esta semana. É o momento de reflexionar sobre o seu estado actual. Podemos destacar que actualmente ten un total de corenta e un proxectos rexistrados e noventa e un usuarios rexistrados. Entre os proxectos máis activos esta semana están gl_be_templates cunha actividade dun 100%, que é unha extensión de Typo3 que proporciona un método para realizar modelos en backend, ao facilitar a independencia da lóxica de aplicación e a presentación de datos. 

Desde o blog de Javier Vázquez da empresa Igalia dáse a coñecer unha iniciativa para crear unha asociación de empresas de Software Libre galega que se integraría nunha plataforma estatal. A xuntanza informativa está prevista para o mércores 23 de maio a partires das 17:30, na sala de reunións da ETSE (Escola Técnica Superior de Enxeñería), no campus sur da Universidade de Santiago de Compostela.