Telefónica I+D acaba de presentar a plataforma EzWeb, unha plataforma de mashup libre, co seu código fonte liberado baixo a licenza AGPL.

En EzWeb, o usuario ten unha páxina principal, onde se amosarán os trebellos que escolla. E, o máis importante, poderá conectar estes trebellos entre eles de forma visual e sinxela. Hai tamén opción de engadir trebellos, de entre a multitude deles que hai dispoñíbeis (feeds de páxinas, vídeos de youtube, dicionario da RAE, mapas...)

Segundo podemos ler na páxina do proxecto, EzWeb é unha plataforma Web estándar e aberta que permite ao usuario construír o seu propio contorno de traballo mediante a selección, configuración, combinación e interconexión dos aplicativos dispoñíbeis, para crear novos aplicativos distribuíbeis.

“Ao falar de código aberto o primeiro que nos vén á cabeza é Linux, pero o certo é que o código aberto non se reduce ao software soamente. Tamén o cinema ten aquí o seu lugar”. Son as apreciacións recollidas na revista dixital sobre ciencia e tecnoloxía, NeoTeo, nunha extensa reportaxe sobre cine de código aberto.

O seu autor, Lisandro Pardo, explica no texto que para que unha película sexa considerada libre ou de código aberto deber cumprir varios requisitos. O primeiro deles pasa polo seu licenciamento. Son moitas as licenzas que, con máis ou menos permisibilidade, son empregadas no campo da produción cultural e artística, pero no caso que nos ocupa só son admitidas as licenzas aprobadas como Traballo Cultural Libre -algunhas das licenzas Creative Commons son commpatíbeis con esta definición. Por outra banda, tamén os materiais que foron empregados para a creación da peza audiovisual deben ter na súa totalidade este mesmo tipo de licenza.

Segundo este primeiro requirimento, tanto a película como os materiais deben estar dispoñíbeis de forma libre e gratuíta sexa a través de descargas por Internet ou doutro medio, e calquera custo aplicábel só debe cubrir a reprodución de material, sen ningunha ganancia adicional.

A Oficina de Software Libre da UDC, acaba de informar mediante a súa páxina web, que a versión en galego do segundo capítulo da banda deseñada Ubunchu xa está dispoñíbel para a comunidade.

Mancomun.org xa dera conta recentemente da publicación deste segundo episodio de Ubunchu, pero ata o de agora non estaba dispoñíbel en galego. Novamente, grazas ao traballo de tradución da Oficina de Software Libre da UDC agora podemos gozar desta educativa banda deseñada.

O segundo episodio deste manga, que conta as aventuras dun club de administradores de sistemas que empregan Ubuntu, leva por título “ILC con Gnomos!” e conta, nesta ocasión, como os protagonistas se poñen a aprender o emprego da interface de liña de ordes (Command Line Interface ou CLI, polas súas siglas en inglés), para o cal comparan as ordes con gnomos e os argumentos que se lle poden engadir ás ordes como as ferramentas destes.

Fixstars anunciou a dispoñibilidade inmediata de Yellow Dog Linux 6.2, a coñecida distribución enfocada cara a familia de procesadores da arquitectura Power, que contará con varias actualizacións para facela máis sinxela de instalar, máis rápida, e máis fácil de usar.

Esta nova versión é compatíbel con:

• Productos Apple PowerPC G4/G5
• PlayStation3, de Sony
• YDL PowerStation

Nesta versión inclúese a opción de empregar o popular Xfce como escritorio mais Enlightenment DR17 segue a ser o contorno de escritorio predeterminado.

A Gran Canaria Desktop Summit, que congrega este ano baixo un mesmo escenario a Guadec e a Akademy, continúa a celebrarse estes días ata o vindeiro día 11 de xullo na illa de Gran Canaria. As actividades programadas para este gran encontro, con máis de mil asistentes, conta cun amplo repertorio de seminarios e obradoiros, entre os que estará esta semana o impartido polos alumnos do Máster de Software Libre Caixanova.

A iniciativa, financiada por Caixanova, permitiralles aos estudantes desta edición do Máster presentar na Guadec-es o traballo que foron realizando de modo colaborativo ao longo das sesións de desenvolvemento do programa formativo: “Tarefas, the small lightweight open-source task manager for GNOME” . Na súa exposición falarán tanto da arquitectura e aspectos técnicos do aplicativo como da metodoloxía seguida para organizar as sesións.

Con esta práctica, os alumnos participarán da conferencia e coñecerán de primeira man a moitos dos gurús das comunidades de software libre.

O equipo de desenvolvemento de VideoLan anunciou recentemente o lanzamento de VLC 1.0.0, na súa versión final. Este reprodutor multimedia de código aberto, é considerado para moitas persoas usuarias, dende hai moito tempo, o mellor no seu eido.

Ademais de ser multiplataforma, ten a característica, que a fai destacar sobre outros aplicativos similares, de que non precisa ningún códec, sendo compatíbel con todo tipo de formatos de audio e vídeo(MPEG-1, MPEG-2, MPEG-4, DivX, mp3, ogg, DVD, VCD, protocolos de streaming, etc.).

As melloras máis sobranceiras desta versión son:

• Ofrece novos códecs HD (Dolby Digital Plus, AES3, TrueHD, Blu-Ray Linear PC, Real Video 3 e 4, etc) , Dirac e MP3.

• Escalado de vídeo en pantalla completa.

• Novos controis de reprodución, que foron axustados canto á súa velocidade de resposta.

• Streaming a través de AirTunes.

• Compatibilidade con dispositivos MTP baixo GNU/Linux.

Podemos ler no blog do proxecto Metacity en Gnome unha entrada escrita por Thomas Thurman, un dos mantedores deste proxecto, na que se pode albiscar o futuro de Metacity.

Metacity é o xestor de xanelas predeterminado do contorno de escritorio Gnome. Ou foino ata o de agora. Segundo nos conta Thurman, semella que está xa decidido que Mutter, unha evolución de Metacity á que se lle engadiu compatibilidade con Clutter, será un dos xestores de xanelas alternativos en Gnome 2.28, e o único en Gnome 3. Esta situación leva ao autor a preguntarse sobre o futuro de Metacity.

Thurman pensa que o mellor para a comunidade será traballar sobre Mutter, e así o fará. Metacity xa non continuará a ser desenvolvido máis alá de correccións de erros.

Para os que puider serlles de interese a información que Mancomún recollía días atrás sobre sistemas de educación en liña libres e gratuítos, hoxe facémonos eco da publicación dun informe sobre campus virtuais de software libre nas universidades españolas. Este documento, elaborado polo Grupo de Investigación de Tecnología Educativa da Universidad de Murcia, ten como obxectivo achegar a realidade dos campus virtuais de software libre empregados nas institucións académicas españolas.

Segundo explican os responsábeis do proxecto, o contexto do ensino superior en España produciu nos últimos anos un movemento significativo en canto ás ferramentas de campus virtual que se viñan empregando, existindo na actualidade un gran número que apoian as tecnoloxías libres.

O informe recolle esta idea nun mapa interactivo web, no que, ademais, está referenciada -por diferentes criterios de busca- a plataforma utilizada por cada universidade española. Por outra banda, o proxecto afonda nas razóns que xustificaron a escolla en cada unha das institucións e analiza detalladamente as distintas ferramentas, cun traballo comparativo desde o punto de vista pedagóxico.

Wammu é un magnifico aplicativo gratuíto e de código aberto (conta con licenza GPL), que nos permite administrar o noso teléfono móbil dende GNU/Linux, aínda que ao tratarse dun aplicativo multiplataforma tamén está dispoñíbel para Windows. Este aplicativo xurdiu para fornecer cun contorno gráfico ao proxecto Gammu, o cal abrangue os aplicativos, os scripts e os controladores da xestión de diversas funcións nos teléfonos móbiles e dispositivos similares.

Esta ferramenta caracterízase por ser moi intuitiva, o que é directamente proporcional á súa facilidade de uso. Respecto da súa funcionalidade ofrécenos un amplo abano de posibilidades para administrar o noso teléfono móbil, como as máis destacadas podemos subliñar a posibilidade de administrar as nosas mensaxes SMS, podendo crear, gardar e enviar mensaxes. Tamén destaca a facilidade para administrar a nosa axenda de contactos, engadindo, editando e borrando contactos. Incluso podemos mover arquivos e configurar as nosas melodías.

Ksplice Uptrack é un aplicativo desenvolvido pola compañía Ksplice, que permite aplicar parches e módulos ao kernel de Linux sen que sexa necesario reiniciar o computador, ademais conta con licenza GPL . Para unha persoa usuaria, en principio o feito de ter que reiniciar o computador, simplemente é unha pequena molestia, pero no eido dos servidores é algo transcendental.

A tecnoloxía de Ksplice Uptrack foi desenvolvida inicialmente no MIT, e máis tarde algúns dos que comezaron ese proxecto, continuárono ata chegar ao resultado actual. O poderío deste aplicativo puido ser visto nos recentes LinuxTag2009 en Berlín e no FISL10 en Brasil.

Por agora Ksplice Uptrack é compatíbel con Ubuntu 9.04 Jaunty Jacklope, que pode ser instalado e que requirirá algúns paquetes adicionais, que serán descargados por Ksplice Uptrack Manager, o cal posúe un aspecto moi similar ao xestor de actualizacións de Ubuntu, e será a ferramenta coa que se xestionarán as futuras actualizacións. Ademais, cando haxa novidades no desenvolvemento do núcleo Linux, aparecerá unha icona no panel de GNOME.