A Deputación da Coruña editou un CD e unha web con ferramentas lingüísticas, dentro das cales hai unhas cantas que son baseadas en proxectos de Software Libre:

Vemos na web da Ciberirmandade da fala que xa teñen dispoñible para a súa descarga o frontal do joomla 1.5 traducido ao galego.

A tradución está baseada no traballo feito por voluntarios e voluntarias no TraduCIF na súa web, e completada, revisada e coordinada por Daniel Muñiz, membro do grupo Trasno.

Comentan tamén que aínda queda algo de traballo de revisión, polo que calquera suxestión, consulta ou dúbida será benvida a través dos seus foros.

Segundo a publicación Heise.de, a entidade xermana da dirección xeral do traballo converteu 13.000 computadores Windowsen computadores con GNU/Linux. A razón indicada é que o uso de Linux será máis seguro e máis barato.

Klauss vitt, director do proxecto, comentou á publicación que Windows NT e Internet Explorer non foran "tecnoloxicamente actualizados" e que "o cambio de plataforma flexibilizara o noso traballo, facilitando ademais a incorporación de novas tecnoloxías na medida que estas estén dispoñibles".

A distribución elixida foi unha versión modificada de OpenSUSE e como navegador web usarán Firefox.

A Asociación Galega de Centros de Negocio envíanos a seguinte nota de prensa: 

A Asociación Galega de Centros de Negocio fai unha decidida aposta polo Software Libre na súa saída a Internet, construíndo integramente a súa plataforma de servizos Web (portal corporativo, xestor de publicidade, reserva de salas, xestor documental...) en base tecnoloxías libres, máis concretamente utilizando a plataforma LAMP (Linux, Apache, Mysql, PHP).

Ferramentas coma Joomla, Openads, phpscheduleit ou Docman, son algunhas das aplicacións utilizadas pola asociación baseadas todas elas en licencias GNU/GPL.

Vemos en Agnix que acaban de presentar a tradución ao galego do primeiro número do Zine, a revista electrónica que publica mensualmente a comunidade brasileira do BrOffice.org. Esta revista, a través das súas seccións tenta achegar o OpenOffice.org (BrOffice.org no Brasil) a usuarios particulares e ao mundo empresarial.

Xa temos datas para a futura versión 3.0 do OpenOffice.org. Estas datas soen ter un carácter provisional e sempre poden variar segundo o número de versións que fagan falta até sacar unha versión final.

Dentro destas datas, resaltamos o comezo da actualización da tradución do OpenOffice.org 3.0, proceso que comezará o 13 de marzo e rematará o 3 de abril aproximadamente. Unha vez feito isto, faranse as probas correspondentes antes de liberar a primeira versión beta a finais de abril.

As primeiras versión "release candidate" comezarán a saír a finais de xullo e a versión final espérase para o 2 de setembro ou coincidindo coa OpenOffice.org Conference 2008...

A “Mancomunidad de Municipios de la Costa del Sol Axarquía” adxudicou á empresa Dulman Rede, S. L. a instalación de Software Libre nuns 700 computadores de 17 municipios da comarca.

O proxecto, que foi adxudicado por 248.472 euros, foi presentado á Consejería de Innovación, Ciencia y Empresa de la Junta de Andalucía. Segundo explicou o presidente do ente mancomunado, José Domínguez Palma, o obxectivo da iniciativa é substituír o sistema operativo Windows por Linux.