Hoxe 29 de maio de 2012 ás 12:00 horas, no auditorio da Biblioteca de Galicia na Cidade da Cultura en Santiago de Compostela, terá lugar o acto de presentación da candidatura do dominio .gal, o dominio de Internet de primeiro nivel para a lingua e cultura galegas, que será remitida á ICANN de forma inminente, xa que aínda que o prazo remata mañá 30 de maio, e a asociación puntoGAL xa completou todos os trámites económicos, técnicos e administrativos para a solicitude do .gal.

O acto consistirá nunha mesa redonda que será inaugurada pola directora da Axencia para a Modernización Tecnolóxica de Galicia, Mar Pereira. Nos relatorios participarán, entre outros, representantes da Fudació Puntcat (que xestiona o .cat, o dominio da lingua e cultura catalás), a Secretaría Xeral de Política Lingüística, Consello da Cultura de Galicia, EGANET, Asociación Galega de Editores e Código Cero.

O acto servirá ademais para explicar os prazos do exame da ICANN e as futuras formas de rexistro do .gal.

Este xoves 31 de maio de 9:00 a 14:00 horas celébrase no Centro Demostrador TIC de Galicia unha xornada demostradora que leva por nome Boas Prácticas – Oportunidades e estratexias para crecer coas TIC.

O obxectivo desta xornada é achegar ás empresas galegas tendencias tecnolóxicas que posibiliten a modernización do seu negocio, a mellora do seu posicionamento na economía galega, así como a apertura a novos mercados, todo elo a través dunha metodoloxía que inclúe relatorios prácticos acompañados de casos de éxito.

Como non podía ser doutro xeito se falamos de tecnoloxías para a modernización e eficiencia TIC para as pemes, o Software Libre terá o seu espazo nesta xornada.

Así, xusto a continuación da apertura da xornada, a empresa TEGNIX dará un relatorio sobre Software Libre como ferramenta de eficiencia e competitividade para as pemes a través do que nos achegará a experiencia do proceso de evolución e mellora nas TIC na empresa Cidadanía cara o Software Libre.

Para que os asistentes poidan coñecer non só a visión máis técnica do provedor TIC, senón unha visión máis próxima á propia como empresa consumidora da tecnoloxía, Tegnix estará acompañada de dúas pemes usuarias, que darán conta dos seus casos de éxito: Cidadanía e Sacauntos.

Igalia, empresa galega de Software Libre, infórmanos que por undécimo ano consecutivo ofrece a posibilidade de realizar prácticas na empresa durante os meses do verán, nas súas instalacións de A Coruña ou Pontevedra.

A realización destas prácticas en empresa está aberta a todos aqueles estudantes de Enxeñería Informática ou Enxeñería Técnica en Informática que teñan máis do 50% dos créditos superados.

O período de prácticas realizarase durante os meses de xullo, agosto e setembro, nalgunha das oficinas da empresa, cunha planificación flexible de 5-8 horas diarias ata un total de 350 horas, distribuídas en 325 horas traballando nun proxecto de Software Libre e 25 horas para redactar a memoria. Como contraprestación, Igalia ofrece ademais unha axuda económica de 1.600€.

• O Centro Nacional de Referencia de Aplicación das TIC baseadas en Fontes Abertas -CENATIC- prestará asesoramento xurídico, tecnolóxico e metodolóxico para o desenvolvemento de negocio baseado en software libre no ámbito galego.
• O presidente de Agasol, Alejandro Escobar, destacou que “o servizo de consultoría que nos ofrece CENATIC a través deste convenio suporá un incremento da calidade no servizo ás empresas e entidades galegas que escollan software libre”

A Asociación de empresas galegas de software libre -AGASOL- asinou o sábado 12 de maio un convenio de colaboración con CENATIC -o Centro Nacional de Referencia de Aplicación das TIC baseadas en Fontes Abertas- polo que AGASOL recibirá asesoramento xurídico, tecnolóxico e metodolóxico para a mellora da liberación do software en Galicia.

A sinatura tivo lugar no marco da presentación da Plan de Acción de Software Libre 2012 por parte da directora da Axencia para a Modernización Tecnolóxica de Galicia (AMTEGA), Mar Pereira coa presencia da Fundación CENATIC a través do seu director xerente, Miguel Jaque, e AGASOL representada polo seu presidente, Alejandro Escobar.

O PLAN DE SOFTWARE LIBRE 2012 DA XUNTA DESENVOLVERÁ 120 ACTUACIÓNS PARA IMPULSAR O USO DO FLOSS NO SECTOR EMPRESARIAL, NA SOCIEDADE E NA ADMINISTRACIÓN

• A Axencia para a Modernización realizará este ano un estudo sobre o impacto da migración exclusivamente a ferramentas ofimáticas de software libre nos ordenadores dos empregados públicos

• O 94% dos equipos informáticos da Administración autonómica contan con ferramentas de software libre, unha porcentaxe que se duplicou desde o ano 2009

• O 45% da formación en novas tecnoloxías ofrecida pola EGAP este ano centrarase no software libre fronte ao 33% do ano pasado

• O vindeiro curso un total 60.000 alumnos galegos disporán de equipamento con ferramentas ofimáticas de fontes abertas

• O emprego do software libre en proxectos de calado como Abalar, a rede Cemit e outros do ámbito da Administración permitiu un aforro de 2,5 millóns de euros no período 2010-2011

• Galicia acollerá este ano por primeira vez a Libre Software World Conference, un dos maiores eventos de difusión do Software Libre que se celebra en España organizado por Agasol e coa colaboración da Xunta

A Directora da Axencia para a Modernización de Galicia presentou o sábado 12 de maio o Plan de Software Libre 2012 da Xunta de Galicia así como o balance das actuacións levadas a cabo durante o ano 2011, que xa fora presentado o día anterior a todos os axentes implicados no mesmo.

O Plan de Software Libre 2012 da Xunta conta cun investimento de 915.000 euros para o desenvolvemento de 120 actuacións dirixidas a impulsar o uso do software libre e código de fontes abertas (Floss) no sector empresarial, na sociedade en xeral e na Administración. O Plan desenvólvese en colaboración coas asociacións galegas de usuarios de software libre (AGUSL), das empresas do sector (AGASOL), coa Comisión Interuniversitaria de Galicia (que integra as tres universidades) e do Colexio Profesional de Enxeñaría Informática de Galicia.

Aforro de 2,5 millóns de euros en proxectos estratéxicos

Ademais das liñas de acción establecidas no Plan, a Xunta está a realizar proxectos estratéxicos baseados en software libre como son Abalar, o desenvolvemento das iniciativas de Administración electrónica e a formación dixital da cidadanía a través da Rede Cemit. Grazas a uso do software libre nestas iniciativas a Xunta aforrou 2,5 millóns de euros no período 2010-2011.

Trasno informa que grazas ao esforzo e traballo de diversos membros do Proxecto Trasno están dispoñibles en galego:

• A suite ofimática Apache™ OpenOffice 3.4
• O contorno de escritorio lixeiro XFCE 4.10 e
• A aplicación de animación 2D Tupí 

Trasno organiza para os vindeiros días 18 e 26 de maio a Trasnada 12.0 unha nova edición do encontro periódico que reúne aos tradutores de software libre ao galego e xa vai pola súa cuarta edición. Nesta ocasión a cidade da Coruña toma o relevo como sede deste encontro a cidades como Vigo, Ourense e Ordes que acolleron as anteriores edicións.

Para aqueles que aínda non coñezan as Trasnadas, o obxectivo principal das mesmas é servir de punto de encontro da comunidade de tradución para fixar terminoloxía no ámbito da tradución para aumentar a calidade das tradución e servir de escaparate ao expor ao público o traballo destes voluntarios a prol da normalización da lingua galega nas tecnoloxías libres que traballan baixo o paraugas do Proxecto Trasno.

A trasnada 12.0 celebrarase no Centro Ágora, na Cidade da Coruña:

• Mapa fornecido polo propio centro Ágora
• Mapa do centro Ágora en OpenStreetMap

Dentro do programa TICemprende, BIC GALICIA pon en marcha unha serie de obradoiros prácticos nos que se presentan ás empresas TIC da nosa comunidade novas tendencias e oportunidades de negocio que contribúan a orientar os seus procesos de innovación e a afianzar o seu posicionamento no mercado así como un incremento significativo da súa competitividade, a través do emprego de novas técnicas e ferramentas de xestión empresarial.

O 28 de maio de 09:30 a 14:30 e de 16:00 a19:00 horas celebrarase na sede do FEUGA en Santiago de Compostela, o obradoiro Oportunidades de negocio baseadas en software libre e ecosistemas open.

O obradoiro impartirase cunha metodoloxía eminentemente práctica que busca a aplicabilidade do aprendido no posto de traballo e na posta en marcha de accións de mellora nas empresas participantes, cos seguintes obxectivos:

• Dotar aos asistentes na visión estratéxica necesaria para aproveitar as oportunidades de negocio que ofrece o software libre.
• Analizar modelos de negocio baseados en software libre.
• Achegar os coñecementos legais imprescindibles para poder deseñar e aproveitar oportunidades baseadas en software libre.

O programa do obradoiro é o seguinte:

A asociación GPUL anunciou este luns o programa final para o IV Obradoiro de Criptografía, Privacidade e Seguridade que se celebrará do 14 ao 16 de maio de 2012 na Facultade de Informática da Coruña (Salón de Actos, andar 0).

Como sempre as xornadas contarán con interesantes charlas e obradoiros de expertos locais no campo, que expoñerán as últimas técnicas coas que están a traballar. Mais este ano conta coa presencia do gran especialista internacional o Doutor Ross Anderson, da Universidade de Cambridge, que impartirá o mércores 16 ás 10:00 horas a súa charla titulada Cryptology and security – where is the research frontier?"

O doutor Ross Anderson pertence ao Grupo de Seguridade do Laboratorio de computación, participou en varios desenvolvementos de algoritmos de cifrado como as primitivas Bear, Lion e Tiger ou o código de cifrado de bloques Serpent; investiga nas relacións da economía e a seguridade da información, na fiabilidade dos sistemas de seguridade, na robustez dos protocolos de seguridade... e é tamén un defensor das liberdades no mundo dixital.

Nesta charla discutirá sobre os problemas da investigación en temas de cifrado e seguridade así como nas diversas compoñentes que inflúen na construción de sistemas seguros.

O programa completo conta coas seguintes intervencións:

Un ano máis o Software libre estará presente na Xuventude Galicia Net. Mañá sábado 5 de maio ás 13:00 horas AGASOL impartirá unha conferencia que leva por nome Emprender da man do Software Libre.

Xavier Castaño, vicepresidente de AGASOL e mais Luis Alberto Fernández, xerente da asociación falarán polo miúdo das oportunidades laborais e de negocio que hai detrás do Software Libre, dos proxectos das empresas que forman parte de AGASOL ... Os asistentes a este relatorio poderán obter información de primeira man de como o software libre permite xerar emprego cualificado e de calidade nas empresas galegas, como contribúe á internacionalización e convencelos de que é unha excelente opción para os novos emprendedores e un importante elemento de diferenciación para as empresas xa establecidas.