O Centro de Referencia e Servizos de Software Libre de Galiza - Mancomún, en colaboración con AGASOL, organiza un curso de formación avanzada de eBox, destinado a profesionais de empresas TIC galegas interesadas en ofrecer servizos de implantación sobre esta plataforma.

eBox é unha aplicación de licenza libre que ten por obxectivo facilitar a administración dunha rede corporativa. Foi concibida e desenvolvida co obxectivo de ser sinxela, de diminuír a curva de aprendizaxe para os administradores da rede e permitirlles aforrar tempo automatizando moitas das súas tarefas de administración diaria.

A plataforma eBox leva 4 anos en desenvolvemento, e co lanzamento, a mediados do mes pasado, da versión 1.0 pódese considerar alcanzado o estado de madurez da aplicación.

Outra das súas características interesantes é que inclúe un completo framework de desenvolvemento que permite a adaptación de xeito doado ás necesidades particulares de cada implantación.

Os vindeiros días 24, 26 e 27 de novembro terá lugar un ciclo de conferencias sobre hardware e software libre na Facultade de ciencias da Universidade de Salamanca:

O luns 24 de novembro, a xente de Golem Group explicará que é o hardware libre e falará dun proxecto no que participan: Ardabasto (unha evolución de Arduino cara a un sistema multiproceso distribuído).

O mércores 26 de novembro preséntase Factoría Viré, un novo espazo virtual libre para o desenvolvemento e/ou adaptación de ferramentas interoperábeis de creación de contidos e actividades en mundos interactivos. Será impartida por Daniel González, un dos desenvolvedores do proxecto.

O xoves 27 de novembre, David Vaquero falará de Factoría Pegaso, un espazo de produción multidisciplinar de software libre, no que colabora no seu desenvolvemento.

Nun blogue dun desenvolvedor da Fundación Mozilla, anuncian que a web de descarga de complementos para os seus produtos, alcanzou a cifra de mil millóns de descargas, unha cifra incrible, que pon de manifesto as indubidables vantaxes do modelo de desenvolvemento aberto.

O Centro de Referencia e Servizos de Software Libre, Mancomún, reuniuse o pasado xoves cos representantes das empresas TIC galegas para definir as prioridades que deben establecerse na promoción das tecnoloxías e os estándares abertos de cara a súa implantación efectiva entre a pequena e mediana empresa de Galiza. A directora xeral de Promoción Industrial e da Sociedade da Información, Helena Veiguela, acompañada do coordinador de Mancomún, Xesús Manuel Benítez Baleato, presidiu a xornada de traballo, na que os asistentes tiveron ocasión de avaliar os resultados acadados co compilación de ferramentas informáticas de licenza libre “DVD Ferramentas Informáticas para a PEME”, creada por Mancomún hai xa un ano; así como de valorar a necesidade de reorientar algunhas das aplicacións recollidas neste.

Helena Veiguela inaugurou o acto facendo balance do produto e demostrando con cifras que o “DVD ferramentas informáticas da PEME” é unha iniciativa que está a superar amplamente os obxectivos marcados inicialmente. Segundo indicou a directora xeral, no ano de existencia repartíronse máis de 6.000 unidades a petición de distintos colectivos empresariais, de centros de formación ou mesmo de usuarios finais. Cifra á que se suman os centos de descargas realizadas por programas dende a páxina de peme.mancomun.org.

Tras a publicación do OpenOffice.org 3.0.0 en galego , xa está dispoñible para todos dende a nosa web a imaxe do CD coas distintas versións da suite ofimática OpenOffice.org en galego para os distintos sistemas operativos, ademais do corrector ortográfico instalable mediante o asistente que trae o OpenOffice.org.

Neste CD pódese atopar:

Podes descargala dende a sección de descargas da nosa web ou na ligazón da imaxe que acompaña a esta nova.

A Asociación de empresarios presentou onte as súas propostas na Confederación de Empresarios de Ourense

A Asociación de Empresas Galegas de Software Libre (AGASOL) presentou onte, por terceira ocasión, a sesión informativa “Software Libre contra a crise”, co que o colectivo empresarial vén recorrendo as principais cidades galegas para dar a coñecer ao sector empresarial as vantaxes das tecnoloxías abertas. A xornada, que transcurriu nesta ocasión na  Confederación de Empresarios de Ourense, reuniu a máis de 40 persoas procedente do tecido empresarial ourensá, así como de entidades locais vencelladas ao sector.

O encontro, enmarcado no programa de actuacións previsto por Agasol en virtude do convenio subscrito coa Dirección Xeral de Promoción Industrial e da Sociedade da Información, foi presentado por Emilio González Iglesias, directivo da Confederación de Empresarios de Ourense, quen agradeceu a actividade de Agasol como “vehículo impulsor e referente tecnolóxico para ofrecer solucións ás PEMES ourensás”.

A empresa Imaxin Software, co financiamento da Consellería de Innovación e Industria, desenvolveu durante os últimos meses o longamene demandado tradutor directo para o par de linguas inglés e galego.

O servizo aínda se encontra na fase de prototipo e non coñecemos todos os detalles pero segundo confirma a empresa, baséase nun novo desenvolvemento en volta do motor Opentrad.

Este proxecto contou coa colaboración das universidades de Vigo e Santiago de Compostela. Segundo dixo o director de márketing de Imaxin, Diego Vázquez, contar cunha ferramenta deste tipo é de vital importancia para o desenvolvemento do país, pois fai accesíbel a información escrita en inglés, que xa se converteu en lingua franca, e ao mesmo tempo pon os contidos en galego ao dispor do resto do mundo.

O responsábel do proxecto, José Ramom Pichel, explicou que, dado o afastamento que existe entre o galego e o inglés, é máis complicado conseguir programar un tradutor automático que ofreza resultados á altura dos tradutores galego-castelán, por exemplo. Porén, dixo que o prototipo, ao quedar liberado para a súa modificación e desenvolvemento pola comunidade, por ser de código aberto, irá mellorando constantemente.