As persoas que non puideron asistir á sesión de portas abertas do “G11n: eu traduzo o teu software” poden coñecer xa de primeira man todo o referente ao mesmo a través do material gráfico dispoñible no wiki do evento.

As presentacións de cada un dos relatores poderán acompañarse de imaxes gráficas coa visualización das fotografías e os vídeos do evento facilitados por Mancomún. Todos estes vídeos están baixo licenza Creative Commons Recoñecemento-Compartir baixo a mesma licenza 2.5

Asemade, están xa expostas as propostas realizadas polos participantes na xornada de debate interno que tivo lugar o domingo 11 de maio.

Un total de oito compañías unirán os seus esforzos á Fundación LiMo co propósito de desenvolver unha nova versión do sistema operativo Linux para teléfonos móbiles. Verizon e Mozilla serán as empresas de referencia nesta alianza, pero xunto a elas estarán outras como Infineon, Kvaleberg, Red Bend Software, Sagem Mobiles, SFR e SK Telecom.

Segundo a informacion facilitada ao longo destes días, Verizon está tratando xa de incorporar no seu novo catálogo un dispositivo móbil LiMo que, de concretarse a operación, sería lanzado para o ano 2009. Pola súa banda, Mozilla intentará que o seu navegador logre posicionarse como o novo sistema operativo para terminais de telefonía móbil no mercado.

Esta última versión é a primeira distribución de Linux que integra KDE 4 e un USB activo non destrutivo

O Proxecto Fedora, unha iniciativa de código aberto con soporte da comunidade e patrocinio de Red Hat, anunciou onte a dispoñibilidade de Fedora 9, a última versión da súa distribución do sistema operativo de código aberto que levará por nome “Sulphur".

Fedora 9 continúa o crecemento baseándose na distribución comunitaria Linux, a cal ofrece as últimas características de tecnoloxía de punta cunha oferta continua de calidade. O nova versión ofrece o primeiro USB activo non destrutivo con persistencia, ademais de consolidarse como a primeira distribución importante con base en KDE 4. Outros aspectos destacables son a inclusión de melloras e optimizacións para Open JDK, GNOME 2.22, NetworkManager, PackageKit, o instalador Anaconda e o explorador Firefox 3 Beta 5, entre outros.

Unha das novas características que nos anunciaba Louis Suárez-Potts alá por setembro do ano pasado na OOoConf 2007 era que moitas das funcionalidades do futuro OpenOffice.org 3 serían a base de extensións. Con esa pretensión, hai un tempo que existe o portal http://extensions.services.openoffice.org onde podemos atopar diversas extensións que nos provén de novas funcionalidades.

A raíz disto, en Mancomún decidimos corrixir algúns erros pendentes do corrector actual do OpenOffice.org2 e portalo como extensión para OpenOffice.org3, instalable a través do “Xestor de extensións”.

A partir de agora temos que diferenciar os 2 correctores ortográficos dispoñibles para OpenOffice.org:

A Rede de Dinamización da Sociedade da Información, en colaboración co Concello do Porriño, co Concello de Salceda de Caselas e con Mancomún (Centro de Referencia e Servizos de Software Libre), organiza un novo curso de construción de páxinas web co programa libre Nvu.

O curso desenvolverase desde o vindeiro 2 de xuño até o 27 do mesmo mes, de luns a venres en horario de tarde (19:00 a 21:00) no Concello do Porriño.

Con esta nova convocatoria formativa preténdese achegar ao emprego desta ferramenta libre, coma alternativa viable ao uso de software privativo.

Con motivo da celebración, o 17 de maio, do Día das Letras Galegas e do Día de Internet, os departamentos de galego e informática do IES San Clemente organizan na véspera desta data unha charla para fomentar a presenza do galego na Wikipedia, así como o seu uso.

O obxectivo da xornada céntrase en dar a coñecer a Galipedia ao profesorado do centro, informando do carácter colaborativo deste proxecto de ámbito internacional e das súas posibilidades como recurso educativo.

Asemade, búscase, con esta iniciativa, a participación activa do persoal docente do centro na mellora e creación de novos artigos, poñendo en valor os contidos das distintas materias xa preparados para as clases cotiás.

Unha comisión de coordinación técnica conciliará a labor realizada por cada un dos organimos

O Centro de Referencia e Servizos de Software Libre de Galiza (Mancomún) traballará de xeito coordinado e continuado coas tres universidades galegas. Será posible grazas ao convenio de colaboración asinado onte polo Conselleiro de Innovación e Industria, Fernando Blanco, cos reitores das tres universidades galegas para a creación e consolidación de oficinas de software libre en cada unha das institucións académicas.

Segundo este convenio, dotado cunha partida orzamentaria de 240.000 euros para o bienio 2008-2009, cada unha das oficinas disporá dun coordinador a tempo completo responsable da coordinación con outras oficinas de software libre universitarias e co propio Centro de Referencia e Servizos de Software Libre de Galiza.

Para este efectos, fixarase o marco de coordinación e colaboración con Mancomún mediante a creación dunha comisión de coordinación técnica das actividades desenvolvidas polas entidades referenciadas.

SplashTop é un escritorio Linux lixeiro que, baseado nun microsistema GNU/Linux preinstalado na placa base, é capaz de proporcionar en cinco segundos acceso a Internet e VOIP sen necesidade de instalación previa.

A comunidade desenvolvedora de Thunderbird xa pode acceder á primeira versión de desenvolvemento de Thunderbird 3. Esta versión está dirixida exclusivamente á comunidade desenvolvedora para a súa validación e está encamiñada á introdución de melloras para a actualización do xestor de correo.

O lanzamento desta nova versión foi inesperadamente adiantado por Mozilla debido a presentación do que deron en chamar Mozilla Messaging. Esta trátase da nova fundación subsidiaria creada por Mozilla coa intención de que o desenvolvemento de Thunderbird non quedase estancado por mor do grande éxito de Firefox. Deste xeito, Mozilla Messaging orientarase cara a aplicacións de caracter comunicativo  (axenda de eventos, busca optimizada...)